Büün, Kirez ayın (iyün) 5-dä, Türkiye Moldova Büükelçisi Fatma Fırat TOPÇUOĞLU hem Kişinêu TİKA koordinatoru Yaver DEMİR Gagauziyeya ofiţial bir vizit yaptılar. Gagauziya öndercileri Canabileri Gagauziya İspolkomun (Bakannık Komitetı) eşiklerindä tuz-ekmklän karşladılar. Nedän sora kendileri Gagauziya Başkanı Mihail FORMUZALlan hem Gagauziya Halk Topluşu (GHT) Başı Stepan ESİRlän buluştu.

    Buluşmakta üüredicilek, Gagauziyada su projesinnän ilgili hem Gagauz Radio-televideniyasına yardım konuları incelendi.

    Bakmadaan ona, ani Moldova gagauz üürencilerinin Türkiyedä üürenmesini bu yıl engelledi, Türkiye genä da buldu kolayını 20 gagauz uşaanı Türkiye Universitetlerinä student almaa.

    Türkiye Büükelçisi urguladı, ani üüredicilik uurunda yardımnar kopmayacek, hem, ani ilerdä bürokrat engellerini geçmää deyni, Komisiya studentleri Türkiye Büükelçiliin binasında seçecek.

    Su projesi uurunda konuşarak sayın Büükelçisi bildirdi, ani Çadır kasabasına içmä su çekmenin ikinci etapı 10-15 günün içindä başlayacek. TIKAnın Kişinêudakı ofisindä olan tendera görä, su işini yapan firma belli.

    Gagauziyada olan erindeki seçimnär konusuna girdiinän, Büükelçi Fatma Fırat TOPÇUOĞLU urguladı, ani seçimnerä katılan insannarın aktiv oldukları gösterer, ani eni seçilän kuvedi insan yınanêr, ondan önemli diişilmeklär bekleer.

    Gagauziya İspolkomundan sora, Büükelçi Fatma Fırat TOPÇUOGLU hem Gagauziya Başkanı Mihail FORMUZAL Komratta bulunan ATATÜRK bibliotekasını hem GRT ofisini gezdilär. ATATÜRK bibliotekasında, Türkiye Büükelçilii tarafından kurulan, seçimnärlän ilgili basın merkezin çalışmasınnan tanıştılar.

    GRTda olan pozitiv diişmekleri ön plana alarak, sayın Büükelçi adadı, ani bu kuruluşa TIKAdan gelän teknik yardımnarı durgunmayacek.

    Komratta ofiţial programa bittiktän sora, Büükelçi Fatma Fırat TOPÇUOĞLU Kongazda bulunan "S. DEMİREL" liţeyinä bir vizit yaptı.

Anasozu.com

Показать/скрыть комментарии